Untitled Document

كلام نسوان

عرض المادة
كلام نسوان
189 زائر
27-02-2017
د.احمد ادم


هن مجموعة من النساء، أمهات وبنات، ثيبات وأبكارا.. يتجمعن بسبب الجيرة..يتحدثن في كل شيء.. رياضة وسياسة ونخيل.. هن : سعاد أخت ود التومة والتومة أمها، وسميرة أخت سمعة وسحر بت الطيب المحامي وسلمى الموظفة وسعدية المدرسة.جلستهن تنعقد كلما تيسَّر. دائماً سحر وسعدية يبتدرن النقاش الخالي من شمارات الحلة ومن قلنا وقالوا حقت التومة وبتها.
سحر : أنتِ يا خالتو سعدية مالهم الناس اليومين دي قايمين، ولي وما ولي..هو في بت ناس بتعرِّس بدون أهلها؟.
سعدية : والله يا بتي قلة شغلة ..!!بدل ما يسهلوا الزواج للشباب ويساعدوهم يشوفوا ليهم شغل يقعدوا يتفلسفوا فينا.
وهنا تدخلت سعاد بثقة: هي بس!! دا موضوع العرس وما العرس..أخوي جاب لينا الجريدة، وقال ناس الشعبي دايرين البنات يعرسوهم كدا ساكت..!!
التومة : ساكت كيفن؟ أنتِ يا بت ما ياكي؟ كيفن ساكت..يعني ملح يعني؟.
سعاد : يا أمي أفهمي الكلام..ولدك قال في ناس قالوا البت تعرس الدايراهو..ولا تكلم أبوها ولا حاجة.
التومة : وأمها تكلمها ولا كمان برضو ما تكلم أمها؟.
سعدية: الموضوع يا حاجة ما كدي..هسع البت البعقد ليها منو؟ أبوها ولا بتعقد براها؟.
التومة : استغفرك يا مالك روحي ..كيفن تعقد براها ؟ما عندها وليان؟.
سعدية : بس يا حاجة..وليان دي ياها القايمين وقاعدين فيها..ناس بقولوا ما لازم ولي وناس بقولوا لازم ولي..
التومة: وهي الما عندها ولي دي البعرسها منو؟ إلا تشوف ليها واحد مقطوع زيها..هو الولد ذاتو .خلوها البت كان ما جاب وليهو وجاب أهله في زول بيديهو بنته ..غايتو إلا يكونوا ناس ساكت مقطوعين طاري.
(سميرة أخت سمعة لم تشارك في الحديث وظلت ساهمة تحدث نفسها بحديث لا تجرؤ على البوح به..فقد كانت تقول لنفسها : هم العرسان وينهم..بولي ولا بدون ولي..ولكنها تذكرت نصيحة أمها لها بمشاركة الحديث.خاصة عندما تكون التومة وبتها مشاركات (عشان ما يقولوا عليها عويرة).
سميرة :هسع يا خالتي التومة بتك دي كان جابت ليها واحد وقالت ليكم عقدت عليهو..بتسوي شنو؟ أها بتطلقوها ولَّا تباركوا ليها..وتحمدوا ربكم ما دام الحكاية بالقانون..وما فيها حرام؟.
التومة : ما فيها حرام؟ تحرم عيشتها كان سوتها..نبارك ليها : يبركوا فيها خنق..وحاتك ود التومة يضبحها جخ عديل..كان عرست منو داك..والله يا هو الفضل..!!.
عزيزي القارئ..لو استمع سياسيونا وعلماؤنا لكلام النسوان لفقهوا.فالمسألة فيها اتفاق ثلاثة من الأربعة، وفيها عرف قوي والعرف له قوة القانون..ما دام توافق الناس عليه. وعدم الولي غير منصوص عليه في مخرجان الحوار..ولكن إن أدخلتموه فيها وعدلتم فلن يتبعكم أحد ولن تتزوج بناتنا إلا بولي.

   طباعة 
0 صوت
التعليقات : تعليق
« إضافة تعليق »
اضافة تعليق
اسمك
ايميلك

/500
تعليقك
5 + 6 = أدخل الكود
روابط ذات صلة
روابط ذات صلة
المادة السابقة
المواد المتشابهة المادة التالية
جديد المواد
أصول لعبة المصالح
ياسين حسن بشبر
كلام الكاميرا