Untitled Document

مملكة السودان..؟؟

عرض المادة
مملكة السودان..؟؟
270 زائر
14-03-2017
أحمد آدم

..

إسماعيل ، الشهير بسمعة ، هو صديق مُقيّم ل"شوية كلام" وهو من القراء المُدمنين للصحافة الورقية .. صديقه ود التومة يلازمه صباحا حتى آذان الظهر ..ود التومة دائما يصنع مادة النقاش..واليوم السبت أتى بكبيرة..عزيزي القارئ لا تعجل كصديقنا سمعة في الحكم عليه, ولنرى ماذا يريد (ود التومة ) قوله ؟ ولماذا هو متردد في طرح رأيه ؟ لنرى:

ود التومة :تعرف يا سمعة اليومين دي في كلام كدا..(بيلاوز) لي..وهسع خائف منك أقوله..

سمعة : يا زول عليك الأمان..قول.

ود التومة : ما دام أديتني الأمان :يا سمعة يا أخوي هسع في رأيك الأحسن شنو : الجمهورية ولا الملكية ؟يعني هسع كان قالوا لينا السودان دا يبقى مملكة السودان ما كان أحسن لينا من الجمهورية؟ وكان عرفنا رأسنا من رجلينا؟ بدل كل شوية انتخابات..ومية واحد دايرين يبقوا رئيس ؟

سمعة : يا زول انت ما نصيح ولا شنو؟ الكلام دا ضد الدستور..

ود التومة : يا زول إنت ما قلت لي عليك الأمان ؟ ياخي الدستور على العين والراص ..أنا بقول ليك مثلا.. مثلا..

سمعة : أها الخلّاك تقول كدا شنو ؟

ود التومة : أيوة كدا..عاين للدول الاسمها مملكة في الدنيا كلها ..روقة..ومبسوطين..والعالم كلو داير يهاجر ليهم.. والدول الاسمها جمهوريات كلها مشاكل وقلاقل وما قادرين يأكلوا..

سمعة : والله يا ود التومة صحي..لكن الجمهوريات دي فيها تحرر..

ود التومة : تحرر كيف والناس وقتها كلو ضائع..منو البيحكم منو؟ إنت يا سمعة النظام الجمهوري دا منو الجابو وبلانا بيهو ؟

سمعة : يعني فرنسا كانت أول دولة ..ومعاك حق ومن حقك تقول القلتو، فالجمهورية ليست صنما مقدسا . الجمهورية لم تأتِ دائماً بالخير، حتى الجمهورية الفرنسية لم تأتِ بالخير، فقد تحولت إمبراطورية نابليون، وأصبحت بعدين مشانق في (جهة الفاندي) ورعب، وتحولوا لأكبر استعمار في دول إفريقيا وشمال إفريقيا والهند الصينية، الجمهورية فيروسيةكمان.. أيام الشيوعية السوفيتية أتت بـ(ستالين) وأتت بالمذابح،صدق يا ود التومة كل الجمهوريات ليست فيها خير،الجمهورية الألمانية أتت بـ(هتلر)، والجمهوريات العربية أهو الفيها ما داير ليهو كلام ...ود التومة : وكمان ازيدك من الشعر بيت : كل التاريخ القاعدين نفخر بيهو..هو تاريخ ملوك..الملك بعانخي والملك ترهاقا..وكان دايرين نشكر زول بنقول ليهو يا ملك ، وكان دايرين نمدح زول بنقول اخلاقه اخلاق ملوك..وخلينا من ديل كلهم : هسع انت ما نفسك تمشي المملكة العربية؟ أو المملكة المتحدة ؟ أو مملكة ..

سمعة : استغفر الله العظيم...استغفرالله العظيم..يازول اقول ليك ما داير أمشي أي حتة بس السودان دا.. جمهورية السودان .

   طباعة 
0 صوت
التعليقات : تعليق
« إضافة تعليق »
اضافة تعليق
اسمك
ايميلك

/500
تعليقك
8 + 3 = أدخل الكود
روابط ذات صلة
روابط ذات صلة
المادة السابقة
المواد المتشابهة المادة التالية
جديد المواد
أصول لعبة المصالح
ياسين حسن بشبر
كلام الكاميرا